საკერვი მანქანების მწარმოებელი კომპანია JANOME თავის ისტორიას იწყებს 1921 წლიდან, როდესაც იაპონელმა მეწარმემ იოკასუ ოსემ (Yosaku Ose) ტოკიოში დაარსა საკერავი მანქანების საწარმო ქარხანა. კომპანიას სახელი JANOME ოფიციალურად ეწოდა 1935 წელს. JANOME იაპონური სიტყვაა და ნიშნავს „გველის თვალს“, ეს სახელწოდება სპეციალურად იქნა შერჩეული რადგანაც კომპანია JANOME-ს საკერავ მანქანებს ქონდათ იმ პერიოდისთვის ინოვაციად მიჩნეული „მრგვალი მაქო“, რომელიც თავისი ფორმიდან გამომდინარე ჰგავდა გველის თვალს.
თავისი განვითარების ეტაპებზე JANOME-მ შექმნა მრავალი ინოვაციური პროდუქტი, 1964 წელს კომპანიამ შექმნა პირველი კვლევითი ცენტრი, რომელიც მიმართული იყო საკერავი მანქანების ტექნოლოგიის დასახვეწად და გასაუმჯობესებლად. JANOME-ს სპეციალისტებმა ასევე შექმნეს მსოფლიოში პირველი კომპიუტერულად პროგრამირებადი საკერავი მანქანა MEMORY7 (1979წ). კომპანიას დაპატენტებული და შემუშავებული აქვს მრავალი ტექნოლოგია, რომელსაც დღეისათვის სხვა მწარმოებლებიც აქტიურად იყენებენ. 1960 წელს JANOME-მ თავისი არეალის გასაფართოვებლად შეიძინა ერთ-ერთი უძველესი ამერიკული ბრენდი "New Home", რომელიც ჩრდილოეთ ამერიკის ბაზარზე აწარმოებდა საკერავ მანქანებს 1862 წლიდან. დღეისათვის კომპანიის ოფისები მდებარეობენ იაპონიის უმსხვილეს ქალაქებში. კომპანიის საკერავი მანქანები იწყობა იაპონიის, ტაივანის და ტაილანდის ქარხნებში, ასევე JANOME-ს ყავს 5 შვილობილი კომპანია და გააჩნია 14 სავაჭრო ფილიალი მთელ მსოფლიოში (აშშ, კანადა, გერმანია, დიდი ბრიტანეთი, შვეიცარია, ავსტრალია, ახალი ზელანდია, ჩილი, ბრაზილია, ჩინეთი და სხვა).
JANOME-ს პროდუქცია თავის თავში აერთიანებს ათწლეულების განმავლობაში დაგროვილ გამოცდილებასა და ხარისხს. ამ ბრენდის ყველა პროდუქტი აკმაყოფილებს მსოფლიოში აღიარებული ხარისხის სტანდარტების ISO 9002 და ISO 14001 ყველა მოთხოვნას. დღეისათვის კომპანია აწარმოებს 280 სახეობის საკერავ მანქანას, დაწყებული მცირე ზომის სახლის საკერავი მანქანებით და დამთავრებული დიდი საწარმოო დანიშნულების დანადგარებით. მრავალი მსოფლიოში ცნობილი საკერავი მანქანების ბრენდები სწორედ JANOME-ს ქარხნებში აწარმოებენ თავიანთ ბრენდირებულ პროდუქციას.
კომპანია JANOME-ს თავისი პროდუქცია 100-მდე ქვეყანაში გააქვს ექსპორტზე. კომპანიაში დასაქმებულია 4000-მდე თანამშრომელი, რომლებიც ყოველდღიურად ქმნიან დღეისათვის ერთ-ერთ ყველაზე ინოვაციურ და ხარისხიან საკერავ მანქანებს ბრენდით JANOME.
