კომპანია LG - ის შექმნის ისტორია იწყება 1947 წელს, როდესაც კორეელმა კუ ინჰუემ (Koo In-hwoi) სეულში დააარსა პატარა ფირმა ”Lak Hui Chemical Industries”, რომლის საქმიანობაც იყო საყოფაცხოვრებო ქიმიისა და კოსმეტიკური საშუალებების წარმოება. კომპანიის მიერ გამოშვებული პირველი პროდუქტი იყო სახის კოსმეტიკური საცხი. უკვე ერთი წლის შემდეგ კომპანიის ასორტიმენტი მნიშვნელოვნად გაიზარდა, შეიქმნა კომპანიის პირველი საკუთარი ლაბორატორია.
1950 - იან წლებში კომპანიის მოქმედების არეალი ფართოვდება. Lak Hui მთელ კორეაში პიველი იწყებს პლასტმასის წარმოებას. კომპანია უშვეპს კორეაში პირველ კრემისებრ კბილის პასტას სახელად ”Lucky”, რომელმაც ისეთ პოპულარობას მიაღწია, რომ სამომავლოდ ყველა სხვა კბილის პასტას Lucky - ით მოიხსენიებდნენ.
1958 წელს სამხრეთ კორეის რესპუბლიკის პრეზიდენტის მხარდაჭერით იქმნება Lak Hui Chemical Industries - ის შვილობილი კომპანია Goldstar, რომლის ძირითად მიმართულებად განისაზღვრა საყოფაცხოვრებო ტექნიკისა და ელექტრო პროდუქციის შექმნა. ერთი წლის შემდეგ კომპანია Goldstar გაყიდვაში უშვებს კორეაში პირველ ტრანზისტორულ რადიომიმღებს.
1960 - იან წლებში Goldstar აგრძელებს წინსვლას და განვითარებას თავისი ინოვაციური პროექტებით: იწყებს ტელეფონის აპარატების გამოშვებას, Goldstar ხდება პირველი კორეული კომპანია, რომელსაც ექსპორტზე გააქვს თავისი რადიომიმღებები. იწყება მაცივრების წარმოება. ასევე Goldstar გახდა პირველი კომპანია, რომელმაც დაიწყო კორეაში პირველი შავ-თეთრი ტელევიზორების წარმოება.
1969 წელს კომპანიას Lak Hui Chemical Industries გადაერქვა სახელწოდება და ეწოდა ”Lucky Group” .
1978 - იან წლეს Goldstar - ის ექსპორტის მოცულობა აჭარბებს 100 მილიონ აშშ დოლარს.
1980 – 90 - იან წლებში კომპანია განაგრძობს განვითარებას, ხსნის საწარმოებს და კვლევით ცენტრებს ევროპაში. ხდება მსხვილი ინვესტიციების ჩადება აქტიური თხევადკრისტალური პანელებისა და პლაზმური ტექნოლოგიების განვითარებისა და წარმოების კუთხით.
1995 წელს Lucky Group - ის მმართველმა კუ ჯაგიონმა (კომპანიის დამაარსებლის კუ ინჰუეს შვილი) მიიღო გადაწყვეტილება, რომ კომპანიის მმართველობაში მყოფი ყველა ბრენდი (Lucky, Goldstar და სხვა) ერთი სახელწოდების ქვეშ გაეერთიანებინა. ასე შეიქმნა კორპორაცია LG Group.
მომავალი წლების განმავლობაში კომპანია LG - მ მრავალი წარმატებული პროექტი განახორციელა, შექმნა სხვადასხვა დანიშნულების სამომხმარებლო ტექნოლოგია და პროდუქტი, რომლითაც მარტივად დაიპყრო მსოფლიოს წამყვანი ქვეყნების ბაზრები. LG იქცა ერთ-ერთ ლიდერ კომპანიად თხევადკრისტალურ და OLED (ორგანული დიოდების) პანელების წარმოების მხრივ. სწორედ LG წარმოებულ გამოსახულების პანელებს იყენებენ თავიანთ პროდუქციაში მსოფლიო დონის ბრენდები.
დღეისათვის კოპანია LG Electronics არის ერთ-ერთი წამყვანი მსოფლიო ბრენდი, მისი სათაო ოფისი მდებარეობს სეულში. კომპანიაში დასაქმებულია 83 000 ათასი ადამიანი მთელი მსოფლიოს მასშტაბით (LG Group - 186 000 თანამშრომელი). 2015 წელს კომპანიის გაყიდვებმა 48.8 მილიარდი აშშ დოლარი შეადგინა.
