რეგისტრატორის კვება ძირითადად ხდება ავტომობილის 12 ვოლტიანი ელექტროქსელიდან (სანთებელას ბუდიდან). ზოგიერთი ვიდეორეგისტრატორი შეიძლება აღჭურვილი იყოს ავტონომიური კვებით, აკუმულატორით, რომელიც უზრუნველყოფს მის მუშაობას ავტომობილის ქსელიდან გამორთვის დროს. აკუმულატორის დადებით მხარეს წარმოადგენს ის, რომ შესაძლებელია ვიდეორეგისტრატორის მოხსნა საქარე მინიდან და ვიდეოგადაღება მანქანიდან მოშორებით, თუმცა გასათვალისწინებელია ისიც, რომ მანქანის რეგისტრატორებს, როგორც წესი ძალიან მცირე მოცულობის აკუმულატორები აქვთ (3-10 წთ ავტონომიური მუშაობა). აკუმულატორის სუსტ მხარეს წარმოადგენს მისი მგრძნობიარობა გარემო ტემპერატურის მიმართ. ასეთი რეგისტრატორის წარმადობა და რესურსი მკვეთრად ეცემა თუ მას მცხუნვარე მზის ქვეშ დიდი ხნით მოუწევს დარჩენა. იგივე შედეგი დგება მკვეთრად დაბალი ტემპერატურის პირობებშიც. ამიტომ აკუმულატორიანი ვიდეორეგისტრატორის გამოყენება რეკომენდირებულია არააგრესიული კლიმატის მქონე ქვეყნებში. შედარებით უფრო უკეთესი მახასიათებლები აქვთ კონდენსატორიან ვიდეორეგისტრატორებს, რომელთათვისაც გარემო ტემპერატურას არანაირი მნიშვნელობა არა აქვს.

ვიდეორეგისტრატორის ხედვის კუთხე განსაზღვრავს მის მიერ გადაღებული კადრის სიგანეს (მოცულობას). რაც უფრო მეტია ხედვის კუთხე მით უფრო მეტი ვიდეო ინფორმაცია (გამოსახულება) მოხვდება კადრში.